Sotelo Sotelo Blanco Edicións, cun catálogo que xa pasa dos 1.000 títulos publicados, percorreu nos vinte e cinco anos da súa historia diferentes etapas, pero sempre seguindo a liña de independencia e de apoio á cultura galega que foi razón da súa creción por Olegario Sotelo Blanco no mes de marzo de 1980.

Se os dous primeiros anos da nosa andaina se dedicaron fundamentalmente a perfecciona-la estrutura editorial, tanto na organización interna e equipo de produción coma no sistema comercial e de promoción, os anos intermedios, ata o 1986, significan a apertura das máis das coleccións e a normalización paulatina da produción no aspecto cuantitativo, para, posteriormente, nos últimos anos oitenta e comezo dos noventa, poñer en marcha a nosa propia distribuidora e inaugura-la sede de San Marcos, en Santiago de Compostela.

As nosas liñas editoriais

Para comprendermos mellor as actuais liñas editoriais de Sotelo Blanco Edicións é imprescindible facer un percorrido breve polo que foi e é a historia da editorial.

Fundada en 1980 dedicouse desde os comezos a un labor de recuperación da cultura galega mediante a edición de facsímiles e libros de conversas con persoeiros da nosa cultura, amais de iniciar unha liña de apoio a xéneros fundamentais, coma a poesía e o teatro, a través das coleccións Leliadoura e A Biblioteca do Arlequín, que dispuñan de senllos premios.

É, daquela, reflexo dunha época de rexurdir para a cultura galega, momento que foi de asentamento e que se expresa a través do xénero fundacional da literatura galega: a poesía e máis concretamente a colección e o premio Leliadoura, fundamental para a literatura galega dos anos oitenta.

A aprobación polo Parlamento de Galicia da Lei de Normalización Lingüística en 1983 e a posterior e progresiva implantación do galego no ensino trae como consecuencia, desde o punto de vista editorial, unha ampliación e diversificación dos lectores e a necesidade de elaborar material didáctico en galego e en Galicia, traendo, polo tanto, un cambio significativo nas nosas liñas editoriais.

No noso catálogo a narrativa pasa a se-lo xénero central con fenómenos como o Premio Blanco Amor, publicado en varias ocasións na nosa colección Medusa Narrativa, que a partir de 1992, tamén vai incluír traducións para o galego de obras publicadas orixinariamente noutras linguas. Tamén a literatura infantil e xuvenil xorde con inusitada forza. Neste eido xa Sotelo Blanco Edicións iniciara unha política de coedicións, cunha editorial catalana, que deu como resultado a publicación de tres coleccións para primeiros lectores: A Porta, A Fiestra e os Libros do Sol e da Lúa, estes últimos na modalidade de álbum en cartoné. Pero é no ano 1990 cando Sotelo Blanco decide dar outro paso e crea a colección Infantil e Xuvenil co obxectivo de publicar e promocionar autores e ilustradores galegos.

A partir do ano 1990, polo tanto, as liñas editoriais de Sotelo Blanco Edicións desenvólvense ó redor de tres eixos fundamentais: --Colección Medusa Narrativa. --Colección Infantil e Xuvenil. --Colección Didáctica.

Neste ano comezouse a publicar tamén a revista trimestral A Trabe de Ouro (Publicación galega de pensamento crítico), que dirixe X. L. Médez Ferrín xunta cun consello de redacción do que forman parte prestixiosos intelectuais e escritores. Hoxe a revista conta con sesenta tomos e quince anos de existencia.

Así mesmo, a editorial publica as obras galardoadas cos premios de ensaio e de creación literaria: Premio Vicente Risco de Ciencias Sociais, Premio Manuel Lueiro Rey de Novela Curta e Premio Risco de Literatura Fantástica.

E, en narrativa, publicáronse autores anovadores, e hoxe fundamentais para entende-la evolución da nosa narrativa a partir dos noventa, coma Xurxo Borrazás, Aníbal C. Malvar ou Xavier Queipo e abríndose a colección a autores estranxeiros de prestixio coma William Golding, Karen Blixen, J. D. Salinger, Richard Ford ou Paul Auster.

En literatura infantil e xuvenil, co desenvolvemento de tres series, unha para primeiros lectores na que prima a ilustración en cor, e outras dúas para o treito madurativo que vai dos oito ós doce anos e de aí en diante, comezámo-la publicación de autores galegos xa consagrados coma García Teijeiro, Bernardino Graña, Ursula Heinze, Concha Blanco, Fina Casalderrey ou X. A. Perozo xunta autores novos e sorprendentes coma Heras Varela,Xelís de Toro ou María Canosa.

Tamén se iniciou a publicación dunha colección xa emblemática dirixida ós adolescentes e mais a calquera tipo de lector interesado na cultura e formas de expresión da mocidade: doce x vintedous. Na que principiaron andaina autores que logo publicarían títulos xa non dirixidos a un lector tan específico, coma Xabier López López, Manuel Darriba ou Jaureguizar. Doce x vintedous, pola súa concepción aberta e fundamentalmente literaria, non determinada por obxectivos didácticos, foi e segue a ser un fito no que atangue a liñas editoriais para adolescentes.

No que respecta ó material para o ensino, Sotelo Blanco comezou coa publicación de libros de apoio ó mestre para de seguida iniciar un proxecto dedicado á Educación Infantil e fundamentalmente centrado na Área de Comunicación e Representación. Pensamos que era primordial que os mestres dispuxesen de material abondo para realizar unha tarefa que cremos é fundamental para a pervivencia da nosa cultura: a alfabetización dos nenos en galego. Así, da grafomotricidade e a lóxica matemática pasamos a elaborar un método de lecto-escritura gracias a colaboración co Colectivo Bubela. Posteriormente publicáronse os cadernos Escribo con Bubela, dedicados á caligrafía, e os contos de lectura progresiva Leo con Bubela, para rematarmos polo de agora coa caixa de recursos e actividades Xogo con Bubela. Realizáronse uns cadernos para aproveitamento da música en Infantil e Primeiro Ciclo de Primaria, traballouse a iniciación á expresión matemática cos cadernos Aprendo os números e abordáronse así mesmo os eixes transversais cun material lúdico exclusivamente pensado para a coeducación: os libros móbiles ¿Quen o fai?, centrados nos oficios, na familia e na escola.

Todo isto non significou o abandono doutros eidos necesarios para a consolidación da nosa cultura: o ensaio, coa colección Estudios e Investigacións, na que se publicaría a Historia da lingua galega, de Ramón Mariño Paz, a Gramática práctica (Morfosintaxe) de Carme Hermida Gulías, todas elas obras de referencia para a cultura galega, ou os clásicos galegos con edicións críticas e comentadas.

O desenvolvemento de libros de texto, como consecuencia da excelente acollida dos nosos materiais para o ensino, é un dos últimos grandes proxecto levados a cabo por Sotelo Blanco Edicións en colaboración cun grupo de mestres especialistas, publicándose libros para as tres áreas centrais, matemáticas, lingua galega e coñecemento do medio, do currículo do Primeiro Ciclo da Educación Primaria.