Pensadas e realizadas sen distinción para nenos e nenas, rapaces e rapazas dos catro ós dezaoito anos e tamén para os adultos que se queiran achegar a estoutro mundo imaxinativo e lúdico, as coleccións de literatura infantil e xuvenil de Sotelo Blanco Edicións teñen como obxectivo deliberado suscita-lo gusto dos rapaces pola palabra escrita, pola invención narrativa e polo mundo fantástico da literatura, satisfacendo asemade tódalas súas esixencias de lectura desque entran en contacto por primeira vez coa literatura ata a adolescencia.

As características fundamentais dos libros presentados nesta sección son a calidade literaria das obras propostas, a súa proximidade ó mundo e mais ós intereses dos rapaces e a necesaria adecuación ás diferentes idades dos lectores. Engádese a isto unha perfecta integración de texto e ilustracións, ofrecendo tamén os libros para primeiros lectores a posibilidade de efectuar unha lectura activa das imaxes, facilitando a comprensión do texto e estimulando a fantasía e maila creatividade. Por outra banda, as ilustracións queren servir de iniciación ás primeiras experiencias estéticas do lector novo, achegándoo a diversos estilos e concepcións artísticas.